ខេត្តកំពង់ធំ ៖ ឧបករណ៍នេសាទណាដែលធ្វើអោយហិនហោចដល់មច្ឆជាតិដូចជារបាំងណរ៉ាវសាច់ក្រហមនិងខៀវជាច្រើនរយកន្លែងបានដាក់ស្ទាក់ចាប់ត្រីលាតសន្ធឹង តាមចរន្តទឹកហូររីកដូចផ្សិតនៅលើផ្ទៃបឹងទន្លេសាបជាពិសេស ក្នុងទឹកដីខេត្តកំពង់ធំ នៅចំណុចទ្វារបឹងផ្ទះឆេះ កោះតាប គន្លុកបាយក្អែក និងនៅក្នុងតំបន់ស្នូលអភិរក្សស្ទឹងសែន ស្ថិតក្នុងឃុំផាត់សណ្តាយ ស្រុកកំពង់ស្វាយ ខេត្តកំពង់ធំ ដែលមានបទល្មើសជាច្រើន ដូចជារបាំងណរ៉ាវក្រឡាញឹករាប់រយខ្សែក្នុងមួយខ្សែៗមិនក្រោមពី៣០០ទៅ១០០០ម៉ែត្រនោះទេដែលក្រុមឈ្មួញបានដាក់ស្ទាក់ចាប់ត្រីពន្លិចទៅក្នុងទឹក និងនៅក្នុងព្រៃមិនដែលឃើញមន្ត្រីជំនាញចុះទៅបង្ក្រាបសោះ ។
តាមសេចក្តីរាយការណ៍ ពីប្រជាពលរដ្ឋដែលកំពុងនេសាទ លក្ខណៈគ្រួសារជាច្រើននាក់ សុំមិនបញ្ចេញឈ្មោះបានឲ្យដឹងថា ចំពោះប្រជានេសាទ ដែលប្រកបរបរបន្តិចបន្តួចសព្វថ្ងៃនេះ ពុំសូវបានផលច្រើនទេ ព្រោះឆ្នាំនេះ មិនសូវសំបូរប្រភេទត្រីធំៗ ។ ចំណែករបាំងណរ៉ាវ គេស្ទាក់ចាប់ត្រី នៅតាមចរន្តទឹកហូរ ដែលត្រីធ្វើចរាចរណ៍ចេញចូល ទៅរកកន្លែងពងកូន ដែលក្នុង១ថ្ងៃៗ ក្នុង១របាំងគេអាចចាប់ត្រីបានសំរាប់កូនត្រីល្អិតៗ ជាពិសេសកូនត្រីប្រាមាន៨០ភាគរយ ក្នុងចំណោមពូជត្រីដទៃទៀតមួយព្រឹកលើកបាន ១០០ គីឡូឡើងទៅ ។
ឈ្មួញទិញត្រីគ្រប់ប្រភេទបានពីការដាក់របាំងខាងលើឈ្មោះកងគាមនិងកូនម្នាក់ទៀតដឹកតាម ទូកឌុកយកទៅលក់នៅផែផ្សារ ក្រោមខេត្តកំពង់ឆ្នាំង ហើយដោយឡែក អ្នកដាក់របាំងមួយចំនួនផ្សេងទៀត គេស្ទាក់ចាប់ត្រីបានដឹកយកទៅលក់ផ្ទាល់ខ្លួន បន្តអោយម៉ូយនៅជើងកំពង់ឆ្នុកទ្រូ ស្រុកបរិបូណ៌ ខេត្តកំពង់ឆ្នាំង ចំណែកត្រីងាប់ល្អិតៗ ដែលសុទ្ធសឹងជាកូនត្រីពូជគេយកទៅធ្វើជាត្រីនុយលក់ចែកចាយ ធ្វើជាចំណីត្រីប្រាត្រីឆ្តោរ និងត្រីរ៉ស់ចិញ្ចឹមនៅក្នុងឃុំផាត់សណ្តាយមួយថ្ងៃៗ មិនក្រោមពី៣តោន ទៅ៥តោននោះឡើយ ។
បទល្មើសខាងលើទាំងអស់នេះ គេឃើញថ្នាក់លើចុះមកបង្ក្រាបម្តងម្កាលដែរ ប៉ុន្តែមិនបានបង្ក្រាបចំណុចពិសេសៗ នោះឡើយ ព្រោះមុននឹងលោកថ្នាក់លើចុះមកបង្ក្រាបម្តងៗ បទល្មើសបានដឹងខ្លួនពី១ថ្ងៃទៅ២ថ្ងៃទៅហើយ គេបានពន្លិចរបាំងចូលក្នុងទឹកដល់បាតដីផ្សំ នឹងមន្ត្រីជំនាញជលផលប៉េអឹម ប៉ូលីស បរិស្ថាន និងអាជ្ញាធរដែនដីឃុបឃិត និងបណ្តែតបណ្តោយផងនោះ ច្បាស់ជារកពុំឃើញឡើយ ។ ចំពោះថ្នាក់លើចុះមកបង្ក្រាបម្តងណាក៍ដូចម្តងណាដែរ ឃើញតែមកដល់កន្លែងបទល្មើសនេសាទ ជួបតែបទល្មើសតូចតាចប៉ុណ្ណោះ ដល់ពេលត្រឡប់ទៅវិញ មិនបាន ២ ម៉ោងផងបទល្មើសងើបឡើងវិញ នៅលើផ្ទៃទឹកព្រោងព្រាតដដែល ចំពោះបទល្មើសច្រើនស្អេកស្កះទាំងនេះ អាជ្ញាធរនៅក្នុងឃុំផាត់សណ្តាយមិនមែនមិនដឹងនោះទេ ព្រោះនេះជាឆ្នាំងបាយរបស់គេទៅហើយ ។
ពាក់ព័ន្ធនឹងបទល្មើសនេសាទខាងលើនេះ មានឈ្មួញដែលជាអ្នកដាក់របាំងដូចគ្នាសុំមិនបញ្ចេញឈ្មោះបានអះអាងថា ពួកគេបានប្រមូលលុយពីអ្នកដាក់របាំងលប លូរ៉ូយ៉ាល់ ដោយមានឈ្មោះពែក និងឈ្មោះហៀង ជាអ្នកយកលុយទាំងនោះទៅអោយសមត្ថកិច្ច ជាថ្នូរនិងការមិនបង្ក្រាបសមត្ថកិច្ចទាំងនោះ ត្រូវបានគេអះអាងថា ឈ្មោះ យ៉ាន់ វិសាក់ (ហៅសែ) នាយផ្នែករដ្ឋបាលជលផលផាត់សណ្តាយជាអ្នកទទួលរ៉ាប់រង ក្នុងការបើកភ្លើងខៀវ អោយពួកគាត់ប្រកបរបរនេសាទល្មើសច្បាប់ខាងលើ ។
ពាក់ព័ន្ធនិងការចោទប្រកាន់ខាងលើនេះ នាយផ្នែករដ្ឋបាលជលផលផាត់សណ្តាយលោក យ៉ាន់ វិសាក់ ហៅសែមិនអាចទំនាក់ទំនងសុំការបំភ្លឺណាមួយបាននៅឡើយទេ នៅព្រឹកថ្ងៃទី២៨ ខែតុលា ឆ្នាំ២០១៤ នេះ ។ ចំណែកលោក ប៉ែន សុវណ្ណារិទ្ធ បានអោយដឹងថា នៅព្រឹកថ្ងៃទី២៨ ខែតុលា លោកអភិបាលស្រុកកំពង់ស្វាយ បានដឹកនាកម្លាំងចុះធ្វើការបង្ក្រាបហើយ ។ រីឯលោកនាយរងសង្កាត់ផាត់សណ្តាយបានអោយដឹងថា ជំនាញបាននិងកំពុងដឹកនាំកម្លាំង ចុះបង្ក្រាបជាបន្តបន្តបន្ទាប់ហើយ ៕
