តាកែវ ៖ ប្រជានេសាទស្ថិតក្នុងស្រុកបុរីជលសារខេត្តតាកែវ បានសំដែងការរិះគន់យ៉ាងចាស់ដៃចំៗចំពោះមន្ត្រីរដ្ឋបាលជលផល ជានាយផ្នែកនាយសង្កាត់នាយខ័ណ្ឌ ដែលទទួលខុសត្រូវក្នុងភូមិសាស្ត្រខាងលើថា បានឃុបឃិតគ្នាអនុញ្ញាតឲ្យមានបទល្មើសសៃយឺនស្បៃមុងខុសច្បាប់ជាច្រើនខ្សែ ដែលក្នុងមួយខ្សែៗ មានប្រវែងចាប់ពី ៣ គីឡូម៉ែត្រទៅ ៥ គីឡូម៉ែត្រ ។
ប្រភពបានប្រាប់ឲ្យដឹងថា ពួកគាត់បានដឹងថា មានសៃយឺនខ្នាតធំ៣ខ្សែ ដែលខ្សែទី១ចាប់ពីចំនុចមុខកំពង់ផែកំពង់អំពិល ចាប់ពីលូទី១ រហូតដល់ទំនប់ថ្នល់កែវ ប្រវែងប្រហែល៤គីឡូម៉ែត្រ ខ្សែទី២ចំណុចព្រែកអណ្តូងចាប់ពីប្រឡាយគិនញី ដល់ព្រែកពងក្រសារ ប្រវែងប្រហែល៣គីឡូម៉ែត្រ ឯខ្សែទី៣ចាប់ពីចំនុចភូមិអន្តាត្បាល ឃុំគោកពោធិ ដល់ប្រម៉ាត់ដីប្រវែងប្រហែល ៣ គីឡូម៉ែត្រទៀត ។
ប្រភពបានបន្តទៀតថា ក្រៅពីសៃយឺនខ្នាតវែងរាប់ពាន់ម៉ែត្រនេះ ក៏នៅមានសៃយឺន ព្រមទាំងល្បាំងបង្កងខ្លីៗជាច្រើនចាប់ពី១គីឡូម៉ែត្រ ចុះក្រោមពាសពេញផ្ទៃទឹកស្ទើរតែគ្មានកន្លែងទំនេរ សំរាប់ការនេសាទ ជាលក្ខណៈគ្រួសារបានឡើយ ។
ប្រជាជនដែលប្រកបរបររកទទួលទាននេសាទជាលក្ខណៈគ្រួសារ បានត្អូញត្អែថា ពួកគាត់រកស៊ីរបរគ្រាន់តែដាក់មងបង់សំណាញ់បន្តិចបន្តួច រកត្រីពុំបានទេ រកព្រឹកខ្វះល្ងាច ព្រោះគេដាក់សៃយឺនរាប់សិបគីឡូម៉ែត្រ ចាប់យកត្រីគ្មានសល់ទេ ចាប់បានត្រីទាំងតូចទាំងធំ បង្កងរាប់រយគីឡូក្នុងមួយថ្ងៃៗ ។
មហាជនបានបន្ថែមថា ឈ្មួញដែលចូលមកដាក់សៃយឺនខុសច្បាប់រាប់គីឡូម៉ែត្រមានភាគច្រើនជាជនជាតិវៀតណាម គឺគេដាក់ជាចំហរទាំងថ្ងៃទាំងយប់ ដោយពួកគេបានបង់លុយរាប់ពាន់ដុល្លាឲ្យមន្ត្រីជំនាញរដ្ឋបាលជលផលគ្រប់ជាន់ថ្នាក់អស់ ហើយចាប់ពីនាយសង្កាត់និងនាយផែ្នករហូតដល់នាយខ័ណ្ឌ ទើបពួកគេអាចដាក់បានយ៉ាងរលូនបែបនេះ ។ ជួបសំភាសន៍តាមទូរស័ព្ទជាមួយលោក ហេង ផល្លាប (ហៅប៉ែលិន) ជានាយសង្កាត់រដ្ឋបាលជលផលទទួលបន្ទុកស្រុកបុរីជលសារ លោកបានឆ្លើយថា លោកមិនបានដឹងថា មានបទល្មើសបែបនេះ នៅក្នុងស្រុកបុរីជលសារទេ ចាំលោកអោយកូនចៅចុះមើល ។
មិនទាន់អាចសុំការស្រាយបំភ្លឺពីលោក ឃិន វែង នាយផ្នែករដ្ឋបាលជលផលដែលមានស្នាក់ការនៅក្បាលពោធិ បាននៅឡើយទេ ដោយទូរស័ព្ទមិនចូល ។ចំណែកលោកនាយខ័ណ្ឌរដ្ឋបាលជលផលស្តីទី លោក សៅ កុសល ថា គាត់កំពុងជាប់ដៃបង្ក្រាបបទល្មើសនេសាទនៅស្រុកព្រៃកប្បាស ហើយលោកប្រាប់ថា បើមានបទល្មើសនៅកន្លែងណាដែលអ្នកយកព័ត៌មានប្រាប់នោះ លោកនឹងសហការចុះបង្ក្រាប ។ យ៉ាងណា មហាជនបានរិះគន់ថា បទល្មើសកើតក្នុងទឹកដីលោកគ្រប់គ្រងរាប់ខែមកហើយ អស់លោកឆ្លើយថា មិនដឹងចាំឲ្យកូនចៅទៅមើលឬក៏ចាំចុះបង្ក្រាប ។ ទាំងនេះគ្រាន់តែជាពាក្យដោះសារឆ្លើយយករួចខ្លួនប៉ុណ្ណោះ ពួកគាត់គ្មានជំនឿលើមន្ត្រីជំនាញកន្ទេលធំ បន្លំដេកទាំងនេះទេ ។
រីឯលោកចៅហ្វាយស្រុកបុរីជលសារក៏មិនខ្វល់ពីការរិះគន់របស់ប្រជាជន តើឲ្យពួកគាត់សង្ឃឹមលើនរណាទៀត ?៕