បរទេស៖ មានដំណេកពេលយប់ល្អ អាចជួយធ្វើឲ្យអ្នកទទួលបានថាមពល និងមានអារម្មណ៍ស្រស់ថ្លា នៅពេលភ្ញាក់ពីដំណេក ។ ហេតុដូចនេះការគេង ឲ្យបានគ្រប់គ្រាន់ ពិតជាមានសារៈសំខាន់ណាស់ សម្រាប់សុខភាពរាងកាយរបស់អ្នក ។ ខាងក្រោមនេះ ជាទង្វើទាំង៨យ៉ាង ដែលអ្នកគួរជៀសវាងធ្វើមុនពេលចូលគេង៖
១. ធ្វើលំហាត់ប្រាណ
ពិតណាស់ថា ការធ្វើលំហាត់ប្រាណ អាចជួយផ្ដល់ប្រយោជន៍ ចំពោះសុខភាព និងជួយឲ្យអ្នកគេងលក់បានស្រួល ។ ប៉ុន្តែប្រសិនជាអ្នកធ្វើលំហាត់ប្រាណច្រើនម៉ោងពេក អាចធ្វើឲ្យសីតុណ្ហភាពក្នុងខ្លួនកើនទ្បើង ដែលជាហេតុនាំឲ្យអ្នក ពុំអាចគេងស្កប់ស្កល់នោះទេ ។
២. មើលទូរទស្សន៍ ឬបើកគេហទំព័រស្វែងរកព័ត៌មាន
តាមការសិក្សាបានឲ្យដឹងថា ពន្លឺដែលចេញពីអេក្រង់ ទូរទស្សន៍ ឬកុំព្យូទ័រ អាចផ្ដល់ផលរំខាន ដល់ការគេងលក់របស់អ្នកបាន ។
៣. ងូតទឹកក្ដៅ
ប្រសិនជាអ្នកងូតទឹកក្ដៅ បន្ទាប់ពីការធ្វើលំហាត់ប្រាណរួច អាចធ្វើឲ្យប៉ះពាល់ដល់ការគេងយប់របស់អ្នក ។
៤. ផឹងកាហ្វេ ឬទឹកច្រើនពេក
ជាតិកាហ្វេអ៊ីន ដែលមាននៅក្នុងកាហ្វេ អាចផ្ដល់ផលលំបាកដល់ការគេងលក់របស់អ្នក ។ លើសពីនេះទៅទៀត ការផឹកទឹកច្រើនពេក អាចធ្វើឲ្យអ្នកក្រោកបត់ជើងតូចញឹកញាប់ ជាហេតុនាំឲ្យរំខានដល់ការគេងលក់ ។
៥. ការធ្វើការងារ
ការធ្វើការងាររហូតដល់យប់ជ្រៅពេក អាចជាមូលហេតុមួយ នាំឲ្យអ្នកមានភាពតានតឹងនៅក្នុងអារម្មណ៍ ដែលធ្វើឲ្យប៉ះពាល់ដល់ការគេងលក់ផងដែរ ។
៦. ការអានសៀវភៅ
ការអានសៀវភៅរឿងប្រលោមលោកដូចជា កំប្លែង ឬស្នេហា អាចធ្វើឲ្យអ្នករីករាយ និងជក់ចិត្តដិតអារម្មណ៍ រហូតដល់ភ្លេចគិតម៉ោងចូលគេងក៏ថាបាន ។
៧. គេងឱបជាមួយសត្វចិញ្ចឹម
បើទោះបីជាអ្នកស្រលាញ់ ឬចូលចិត្តជាមួយនឹងសត្វចិញ្ចឹមយ៉ាងណាក៏ដោយ ប៉ុន្តែអ្នកមិនត្រូវយកវាមកគេងជាមួយអ្នកនោះទេ ព្រោះវាអាចរំខានដល់ការគេងរបស់អ្នកបាន ។
៨. មានជម្លោះនឹងគ្នា
ប្រសិនបើអ្នកកើតមានជម្លោះ មុនពេលដែលចូលគេង វាអាចឲ្យមានផលប៉ះពាល់ដល់ការគេងរបស់អ្នក ៕