ភ្នំពេញ ៖ កាលពីវេលាម៉ោង២និង៣០នាទីទាំបភ្លឺ ឈានចូលថ្ងៃទី១៧ ខែមិនា ឆ្នាំ២០១៥ មន្ត្រីប៉ូលិសប្រឆាំងភេរវកម្មក្រសួងមហាផ្ទៃម្នាក់ចេញពីខារ៉ាអូខេស្រវឹងដើរត្រឡប់ទៅផ្ទះនៅក្បែរនោះ ក៏ត្រូវក្រុមចោរមួយក្រុមស្ទាក់វាយប្លន់យកកាបូបលុយ ខ្សែរកនិងទូរស័ព្ទបានហើយគេចខ្លួនដោយសុវត្តិភាព ត្រង់ចំណុចបណ្ដោយផ្លូវ១០៥ ស្ថិតក្នុងសង្កាត់បឹងត្របែក ខណ្ឌចំការមន ។
បុរសរងគ្រោះឈ្មោះ សំ គង់ ភេទប្រុស អាយុ៥១ឆ្នាំ ជាមន្ត្រីប៉ូលិសប្រឆាំងភេរវកម្មក្រសួងមហាផ្ទៃ បច្ចុប្បន្នស្នាក់នៅផ្ទះលេខ២០ ក្រុម២៣ ភូមិ៧ តាមបណ្ដោយផ្លូវលេខ៩៩ ក្នុងសង្កាត់បឹងត្របែក ខណ្ឌចំការមន ត្រូវក្រុមចោរប្លន់យកកាបូបលុយអស់ចំនួន១២២០ដុល្លារ ខ្សែរកប្លាទីនបណ្តោងព្រះទំងន់៥ជី ទូរស័ព្ទដៃមួយគ្រឿង និងកាតសំគាល់ខ្លួនមន្ត្រីប៉ូលិសចំនួន១ ។
បើតាមសម្ដីបុរសរងគ្រោះបាននិយាយរៀបរាប់ថា នៅមុនពេលកើតហេតុរូបគាត់ទើបចេញពីខារ៉ាអូខេ J ដោយផ្ទះនៅក្បែរនោះទើបរូបគាត់មិនជិះអ្វីទៅនោះទេ ក៏ដើរទៅផ្ទះ ធ្វើដំណើរតាមបណ្ដោយផ្លូវលេខ១០៥(លូទឹកស្អុយ) ស្រាប់តែលេចមុខក្រុមចោរមួយក្រុមមានគ្នាប្រមាណ៤ទៅ៥នាក់មកស្ទាក់និងវាយរូបគាត់ប្លន់យកកាបូបលុយ ខ្សែរ ក និងទូរស័ព្ទដៃហើយគេចខ្លួនបាត់អស់ បន្ទាប់មកគាត់បានទូរស័ព្ទប្ដឹងទៅសមត្ថកិច្ចប៉ូលិស ដើម្បីសុំការអន្តរាគមន៍ផងដែរ ។
បន្ទាប់ពីកើតហេតុសមត្ថកិច្ចមូលដ្ឋាន ក៏បានមកដល់ធ្វើការសួរនាំជនរងគ្រោះ រួចក៏នាំទៅប៉ុស្ដិ៍ដាក់ពាក្យបណ្ដឹងនិងសួរនាំបន្តដើម្បីកំណត់មុខសញ្ញា ៕