ខេត្តព្រះសីហនុ ៖ សមត្ថកិច្ចកងរាជអាវុធហត្ថខេត្តព្រះសីហនុ បានបើកយុទ្ធនាការចាប់ឃាត់ខ្លួនមនុស្សចំនួន ៧ នាក់ ជាបន្តបន្ទាប់ នៅត្រង់ចំណុចពយយាយម៉ៅ ភូមិកោះតូច សង្កាត់កោះរ៉ុង ក្រុង-ខេត្តព្រះសីហនុ កាលពីរសៀលថ្ងៃទី ២០ ខែ មីនា ឆ្នាំ ២០១៥ ដោយ មនុស្សទាំង៧នាក់នេះ ជាប់ពាក់ព័ន្ធ២ករណីដាច់ដោយឡែកពីគ្នា គឺបួននាក់ជាប់ពាក់ព័ន្ធកាប់បំផ្លាញព្រៃឈើ និង ៣នាក់ទៀត ជាប់ពាក់ព័ន្ធបទលួចដោយមានស្ថានទំងន់ទោស ប្រព្រឹត្តិទៅលើជនបរទេសចំនួន ២ នាក់។
លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ បានមានប្រសាសន៍បញ្ជាក់ប្រាប់អោយដឹងថា ការចាប់ឃាត់ខ្លួនមនុស្ស៧នាក់ខាងលើនេះ គឺធ្វើឡើងខណៈពេលមានករណីជនបរទេសចំនួន ២នាក់ ទីមួយមានឈ្មោះ Mike (ម៉េក) សញ្ជាតិ កាណាដា និងម្នាក់ទៀតឈ្មោះ John (ចន) សញ្ឌាតិ ហ្វាំងឡង់ ត្រូវជនល្មើសមួយក្រុមព្រួត គ្នាវាយបណ្តាលអោយរបួសធ្ងន់ធ្ងររួចហើយប្លន់យក ទ្រព្យសម្បត្តិមួយចំនួនដូចជា កាបូបស្ពាយដាក់ចំនួន ១ , លេបថបមួយគ្រឿង និង ទូរស័ព្ទៃដៃមួយគ្រឿង ព្រមទាំងប្រាក់ដុល្លាមួយចំនួនផងដែរ។ កម្លាំងកងរាជអាវុធហត្ថ ក្រោយពីទទួលបានករណីភ្លាម ក៏បានចុះធ្វើការស៊ើបអង្កេតស្រាវជ្រាវយ៉ាងយកចិត្តទុកដាក់នៅចំណុចកើតហេតុភ្លាមៗផងដែរ រហូតឈានទៅដល់ការចាប់ខ្លួនមនុស្សចំនួន ៧ នាក់ ដោយក្នុងនោះ ៣ នាក់ ពាក់ព័ន្ធនឹងការវាយប្លន់ជនបរទេសចំនួន ២ នាក់ គឺទី ១ ឈ្មោះ Mike (ម៉េក) សញ្ជាតិ កាណាដា និងម្នាក់ទៀតឈ្មោះ John (ចន) សញ្ឌាតិ ហ្វាំងឡង់ ។ ដោយឡែកសំរាប់៤នាក់ទៀត ជាប់ពាក់ព័ន្ធកាប់បំផ្លាញព្រៃឈើក្នុងដែនបំរុងទុកអចិន្ត្រៃយ៍របស់រដ្ឋ។
លោកឧត្តមសេនីយ៍ត្រី បានបញ្ជាក់ប្រាប់អោយដឹងទៀតថា ជនជាប់សង្ស័យ៣នាក់ ដែលពាក់ព័ន្ធវាយប្លន់ជនរងគ្រោះជាជនជាតិបរទេស ២ នាក់ខាងលើ ទី១ឈ្មោះ ជួប ទិត្យ ភេទ ប្រុស អាយុ ២៧ ឆ្នាំ មុខរបរ កម្មករអារឈើ, ទី២ឈ្មោះ ជឹម រតនា ភេទ ប្រុស អាយុ ២១ ឆ្នាំ មុខរបរ ម្ចាស់ម៉ាស៊ីន, ទី៣ឈ្មោះ ឃួន ហ៊ន ភេទ ប្រុស អាយុ ២៤ ឆ្នាំ មុខរបរ កម្មករអារឈើ ។ ជនទាំងបីនាក់នេះ ក្រោយពីធ្វើការសាកសួររួច ត្រូវបានបញ្ជូនទៅស្នងការប៉ូលីសនគរបាលខេត្ត តាមការស្នើសុំ ដើម្បីកសាងសំណុំរឿងបន្តជូនទៅសាលាដំបូងខេត្ត។ ដោយឡែកសំរាប់ជនជាប់សង្ស័យពាក់ព័ន្ធការកាប់បំផ្លាញព្រៃឈើចំនួន ៤ នាក់, ១ មានឈ្មោះ ជឹម ឧត្តម ភេទ ប្រុស អាយុ ២១ ឆ្នាំ មុខរបរ កម្មករអារឈើ ។ ២- ឈ្មោះ ជឹម រឹម ភេទ ប្រុស អាយុ ៣០ ឆ្នាំ មុខរបរ កម្មករអារឈើ។ ៣- ឈ្មោះ ហ៊ើង សេងថៃ ភេទ ប្រុស អាយុ ១៨ ឆ្នាំ មុខរបរកម្មករអារឈើ។ ៤- ឈ្មោះ ឃួន សុធា ភេទ ប្រុស អាយុ ២៩ ឆ្នាំ មុខរបរបើកទូកទេសចរណ៍។ អ្នកទាំង៤ត្រូវបានប្រគល់អោយខណ្ឌរដ្ឋបាលព្រៃឈើខេត្តអនុវត្តតាមនីតិវិធីនៃច្បាប់នៅរសៀលថ្ងៃទី ២៣ ខែ មីនា ឆ្នាំ ២០១៥ រួចរាល់ហើយ។