ចាប់តាំងពីមានការវាយប្រហារតាមជើងអាកាសប្រឆាំងនឹងក្រុមឧទ្ទាមហូធីក្នុងប្រទេសយេមែន ដែលដឹកនាំដោយអារ៉ាប៊ីសាអូឌីតមក មានក្មេងស្លាប់៦២នាក់ហើយ និងក្មេង៣០នាក់ផ្សេងទៀតរងរបួសធ្ងន់។ នេះបើតាមការបញ្ជាក់ពី ទីភ្នាក់ងារកុមារអង្គការសហប្រជាជាតិ(UNICEF)កាលពីថ្ងៃទី៣១មីនា។
ជាមួយគ្នានេះ អគ្គលេខាធិការអង្គការសហប្រជាជាតិ លោកបានគីមូន បានសម្ដែងព្រួយបារម្ភយ៉ាងខ្លាំងពីស្ថានភាពនៅក្នុងប្រទេសយេមែន ចាប់តាំងពីអារ៉ាប៊ីសាអូឌីតបើកការវាយប្រហារតាមជើងអាកាសប្រឆាំងនឹងក្រុមឧទ្ទាមហូធីកាន់តែខ្លាំងឡើងៗ។ លោកបានអំពាវឱ្យ អ្នកចូលរួមក្នុងប្រតិបត្តិយោធាដើម្បីប្រឆាំងនឹងក្រុមឧទ្ទាមហូធី ត្រូវគោរពច្បាប់មនុស្សធម៌អន្តរជាតិ។ លោកបានបន្ថែមទៀតថា ត្រូវប្រកាន់ខ្ជាប់ខ្ជួនជានិច្ច ដើម្បីការពារជនស៊ីវិលក្នុងប្រទេសយេមែន៕