ខេត្តស្វាយរៀង ៖ ទីបំផុតលោកស័ក្តិ៥ អ៊ឹង សុងយូ ដែលបានកាន់តំណែង ជានាយប៉ុស្តិ៍ច្រកទ្វារព្រំដែនបាវិត ខេត្តស្វាយរៀង ត្រូវបានដកបញ្ឈរជើង នៅក្រសួងមហាផ្ទៃ រង់ចាំទទួលតំណែងខ្លាញ់ថ្មីមួយ ស្របទៅតាមមហិច្ឆតារបស់គាត់ហើយលោកស័ក្តិ៥ ខាត់ សារ៉ាត់ ជាអតីតនាយប៉ុស្តិ៍ នគរបាលអន្តោប្រវេសន៍ ប្រចាំច្រកព្រំដែន អន្តរជាតិក្អមសំណ នៃស្រុកលើកដែក ខេត្តកណ្តាល ត្រូវបានតែងតាំង ជាប្រធាននគរបាល អន្តោប្រវេសន៍ ប្រចាំច្រកបាវិត ជំនួសលោក អ៊ឹង សុងយូ កាលពីថ្ងៃទី១០ ខែមិថុនា ឆ្នាំ២០១៤ កន្លងទៅនេះ ក៏ចាប់ផ្តើមបង្កើតឲ្យមានបណ្តាញពុករលួយ ផ្គើនទៅនឹងការកែទម្រង់ស៊ីជម្រៅ។
សេចក្តីរាយការណ៍ ពីខេត្តស្វាយរៀង បានឲ្យដឹងថា ច្រកអន្តរជាតិបាវិត គឺជាតំបន់យុទ្ធសាស្ត្រដ៏សំខាន់មួយ ដែលក្រុមឈ្មួញធំៗ បានដឹកជញ្ជូនទំនិញគេចពន្ធ និងទំនិញខុសច្បាប់ ចូលប្រទេសកម្ពុជា យ៉ាងគគ្រឹកគគ្រេង ដូចជាទំនិញខុសច្បាប់ របស់ឈ្មួញធំៗ ដែលត្រូវបាននាំចូលប្រទេសកម្ពុជា ត្រូវបានគេក្លែងបន្លំ ជាទំនិញវិនិយោគ ដែលបន្ទុកពន្ធអាកជារបស់រដ្ឋ នាំឲ្យខាតបង់ចំណូលថវិកាជាតិ យ៉ាងច្រើនសន្ធឹកសន្ធាប់។ ការដឹកជញ្ជូនទំនិញគេចពន្ធ បង្កប់ជាមួយរថយន្តក្រុង នៅតែកើតមានជាហូរហែ តាមច្រកអន្តរជាតិបាវិត ដែលក្នុងមួយថ្ងៃៗ ទំហំនៃការដឹកជញ្ជូនទំនិញគេចពន្ធ និងទំនិញខុសច្បាប់ បង្កប់តាមរថយន្តក្រុងមិនតិចជាង ២០តោននោះទេ បើគិតជាប្រាក់ពន្ធវិញ មួយថ្ងៃៗខាតបង់ចំណូលថវិកាជាតិ ដល់ទៅរាប់ម៉ឺនដុល្លារ អាមេរិកឯណោះ។
តាមគោលការណ៍ចាស់លោក ខាត់ សារ៉ាត់ បានបន្តបិទភ្នែក ឲ្យមន្ត្រីក្រោមឱវាទរបស់ខ្លួន បន្តចេញប័ណ្ណ ឬរក្សាទុកប័ណ្ណវីអាយភី ឲ្យជនជាតិយួន ដែលធ្វើការតាមកាស៊ីណូ ជាប់ព្រំដែនបាវិត ប្រើប្រាស់ចេញចូល ឆ្លងកាត់ព្រំដែនថ្មើណាក៏បាន ហើយការចេញប័ណ្ណ វីអាយភី ឲ្យជនជាតិយួនប្រើប្រាស់ ក្នុងការឆ្លងដែនមកបម្រើការ នៅកាស៊ីណូលើកទឹកដីខ្មែរ ដែលមានសុពលភាពរយៈពេល ៦ខែ ឬ ១ឆ្នាំ ហាក់ដូចជាផ្ទុយពីគោលការណ៍ របស់ក្រសួងមហាផ្ទៃ។ គេដឹងថា ការចេញប័ណ្ណ វីអាយភី ឲ្យជនជាតិយួនឆ្លងកាត់ព្រំដែនដោយសេរី និងមានលក្ខណៈពិសេស ប្រមូលបានលុយច្រើនសន្ធឹកសន្ធាប់ យកទៅច្រកហោប៉ៅផ្ទាល់ខ្លួន ដែលរហូតមកដល់ពេលនេះ លោក ខាត់ សារ៉ាត់ មិនមានឆន្ទៈលុបបំបាត់នោះទេ គឺបន្តឲ្យមន្ត្រីក្រោមឱវាទអនុវត្តន៍ តាមគោលការណ៍ចាស់ ក្នុងការប្រមូលលុយយកទៅចែកគ្នា ធ្វើមានធ្វើបានផ្ទាល់ខ្លួន មិនខ្វល់ខ្វាយពីចំណាត់ការ របស់អង្គភាព ប្រឆាំងអំពើពុករលួយ នោះទេ។
ប្រជាពលរដ្ឋដែលធ្លាប់ធ្វើដំណើរ ឆ្លងកាត់ច្រកអន្តរជាតិបាវិត ធ្លាប់បានបង្ហើបឲ្យដឹងផងដែរថា សម្រាប់ប្រជាពលរដ្ឋ ដែលមានការចាំបាច់ ត្រូវឆ្លងដែនទៅកាន់ស្រុកយួន ដោយសារមានជំងឺត្រូវសង្គ្រោះបន្ទាន់ ឬជូនបងប្អូនទៅព្យាបាលជំងឺ ហើយគ្មានលិខិតឆ្លងដែន ត្រូវបង់លុយឲ្យមន្ត្រីនគរបាល អន្តោប្រវេសន៍របស់លោក ខាត់ សារ៉ាត់ ចំនួន ២០ដុល្លារអាមេរិក ហើយមានការកោសរូស ឲ្យបង់លុយតាមរយៈអ្នកគួកជេ មួយចំនួនទៀត ទើបអាចឆ្លងដែន ចេញទៅស្រុកយួន បើមិនដូច្នេះទេនឹងជួបឧបសគ្គ ខាតបង់ពេលវេលា។ នៅពេលត្រឡប់ចូលប្រទេសកម្ពុជាវិញ សម្រាប់ប្រជាពលរដ្ឋ ដែលគ្មានលិខិតឆ្លងដែន ត្រូវបង់ប្រាក់ចំនួន ២០ដុល្លារ ផ្សេងទៀត ហើយបើសរុបថ្លៃបង់សេវា នៅច្រកអន្តរជាតិបាវិត សម្រាប់ប្រជាពលរដ្ឋ ដែលគ្មានលិខិតឆ្លងដែន ត្រូវចំណាយលុយក្នុងម្នាក់ យ៉ាងតិច ៥០ដុល្លារអាមេរិក ទាំងទៅទាំងមក។
លើសនេះទៅទៀត នគរបាលអន្តោប្រវេសន៍ ប្រចាំច្រកអន្តរជាតិបាវិត បានតម្រូវឲ្យរថយន្តដឹកទំនិញ និងរថយន្តក្រុង ដែលត្រូវធ្វើដំណើរឆ្លងកាត់ព្រំដែន បង់លុយថ្លៃបារ៉ាស់ ក្នុងកម្រិតខ្ពស់ មិនអាចប្រកែកតវ៉ា ឬសុំចុះថ្លៃបានទេ ព្រោះសិទ្ធិអំណាច គ្រប់គ្រងច្រកព្រំដែនអន្តរជាតិបាវិត ស្ថិតនៅក្រោមកណ្តាប់ដៃ នគរបាលអន្តោប្រវេសន៍ ប្រសិនបើមន្ត្រីទាំងនោះ មានអារម្មណ៍ល្អ ឬម្ចាស់រថយន្តបង់លុយគ្រប់ចំនួន អាចធ្វើដំណើរឆ្លងកាត់បារ៉ាស់ព្រំដែន យ៉ាងងាយស្រួលបំផុត ប៉ុន្តែក្នុងករណីដែលមិនបានបង់លុយ ទៅតាមការតម្រូវ ច្បាស់ជាជួបឧបសគ្គ ត្រូវនគរបាលអន្តោប្រវេសន៍ របស់លោក ខាត់ សារ៉ាត់ កោសរូសបង្ខំឲ្យបង់លុយ តាមរយៈការរំខានផ្សេងៗ ទៅតាមជំនាញរបស់ពួកគេ៕
Comments Off on លោកស័ក្តិ៥ ខាត់ សារ៉ាត់ ឲ្យប៉ូលីសអន្តោប្រវេសន៍ច្រកបាវិត អនុវត្តន៍គោលការណ៍ចាស់ ដើរតាមរូបមន្តពុករលួយ របស់លោក អ៊ឹង សុងយូ
លោកស័ក្តិ៥ ខាត់ សារ៉ាត់ ឲ្យប៉ូលីសអន្តោប្រវេសន៍ច្រកបាវិត អនុវត្តន៍គោលការណ៍ចាស់ ដើរតាមរូបមន្តពុករលួយ របស់លោក អ៊ឹង សុងយូ
Filed in: សូមរាយការណ៍