បើតាមប្រភពពីមន្រ្តីនៅច្រកកំពង់ផែកែវផុស ស្រុកស្ទឹងហាវ ខេត្តព្រះសីហនុ បានឲ្យដឹងថា ច្រើនឆ្នាំកន្លងទៅនេះលោក ហេង សំហៃ ប្រធានការិយាល័យគយច្រកកំពង់ផែកែវផុស ប្រើអំណាច និងតួនាទីប្រមូលលុយតាមរបៀបពុករលួយតាមអំពើចិត្ត។ រហូតមកដល់ពេលនេះឈ្មួញធំៗច្រើននាក់នៅតែនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់តាមច្រកកំពង់ផែកែវផុស យ៉ាងពេញបន្ទុក ព្រោះមានការបើកដៃពីសំណាក់លោក ហេង សំហៃ ដែលល្បីល្បាញខាងពុករលួយ។ រីឯលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា ធ្វើមិនដឹងមិនឮអ្វីទាំងអស់ចំពោះអំពើពុករលួយពេញទំហឹងរបស់លោក ហេង សំហៃ ប្រធានការិយាល័យគយច្រកកំពង់ផែកែវផុស ព្រមទាំងបក្ខពួក។
ប្រភពស្និទ្ធនឹងលោក ហេង សំហៃ បានបង្ហើបឲ្យដឹងថា មេៗគយក្នុងខេត្តព្រះសីហនុ មិនហ៊ានប៉ះពាល់លោក ហេង សំហៃ នោះទេ ព្រោះអីលោក ហេង សំហៃ មានខ្នងបង្អែករឹងមាំនៅក្នុងអគ្គនាយកដ្ឋានគយ និងរដ្ឋាករកម្ពុជា។ ទំនិញដែលឈ្មួញធំៗនាំចូលតាមច្រកកំពង់ផែកែវផុស បង់ពន្ធមិនដល់50ភាគរយផងទេ ហើយក្រៅពីនេះឈ្មួញឃុបឃិត បែងចែកផលប្រយោជន៍ជាមួយលោក ហេង សំហៃ យ៉ាងសុខស្រួល ធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។ ដូច្នេះលោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ មិនគួរបណ្ដែតបណ្ដោយតទៅទៀតទេព្រោះរឿងអាស្រូវពុករលួយរបស់លោក ហេង សំហៃ មេគយច្រកកំពង់ផែកែវផុស ស្រុកស្ទឹងហាវ ខេត្តព្រះសីហនុ ជារឿងមិនអាចបិទបាំងបានទេ។
មន្រ្តីនៅច្រកកំពង់ផែកែវផុសបានឲ្យដឹងថា ឈ្មួញធំៗច្រើននាក់ដែលរកស៊ីនាំចូលទំនិញ តាមច្រកនេះសុទ្ធតែសុំការយោគយល់ពីលោក ហេង សំហៃ ហើយបង់លុយលើតុក្រោមតុតាមការកំណត់របស់លោក ហេង សំហៃ ដើម្បីឲ្យមុខរបរពួកគេដំណើរការយ៉ាងរលូន។ គ្មានឈ្មួញណាហ៊ានតវ៉ាជាមួយលោក ហេង សំហៃ នោះទេ ព្រោះលោក ហេង សំហៃ បានប្រើឈ្មោះមន្រ្តីគយធំៗមួយចំនួននៅក្នុងអគ្គនាយកដ្ឋានគយ និងរដ្ឋាករកម្ពុជា ដើម្បីការពារទង្វើរបស់ខ្លួនជារៀងរហូត។ ប្រសិនបើគ្មានខ្នងបង្អែករឹងមាំទេនោះ គឺលោក ហេង សំហៃ មិនអាចរក្សាតំណែងជាប្រធានការិយាល័យគយច្រកកំពង់ផែកែវផុស ឡើងដុះស្លែ ហើយសាងភាពល្បីល្បាញខាងពុករលួយពេញទំហឹងដូចសព្វថ្ងៃនេះឡើយ៕