តាកែវ ៖ នៅថ្ងៃទី២៨ ខែមេសា ឆ្នាំ២០២៣ រដ្ឋបាលខេត្តតាកែវ បានបើកកិច្ចប្រជុំ ស្តីពីការងារកៀរគរកមូលនិធិសម្រាប់ខួបទី១៦០ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ២០២៣ របស់សាខាកាកបាទក្រហមកម្ពុជាខេត្តតាកែវ ក្រោមអធិបតីភាព ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត ដោយមានអញ្ជើញចូលរួមពី គណៈកម្មការសាខា មន្រ្តីប្រតិបត្តិសាខា និងមន្ទីរអង្គភាពនានាជុំវិញខេត្ត។
ឯកឧត្តម អ៊ូច ភា អភិបាលខេត្តកែវ បានកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងធ្វើការងារអស់កម្លាំងការចិត្តរបស់មន្ត្រីប្រតិបត្តិសាខា អនុសាខាក្រុង ស្រុកទាំង១០ ក្នុងការចុះសួរសុខទុក្ខ និងនាំយកអំណោយផ្ដល់ជូននូវគ្រួសារក្រីក្រចាស់ជរា គ្មានទីពឹង កុមារកំព្រា កុមារងាយរងគ្រោះដោយសារជំងឺអេដស៍ និងគ្រួសាររងគ្រោះដោយសារគ្រោះធម្មជាតិ និងគ្រោះមហន្តរាយផ្សេងៗ នៅក្នុងខេត្តតាកែវ នាពេលកន្លងមក។
ឯកឧត្តម អភិបាលខេត្ត ក៏បានបន្តទៀតថា ការកៀងគររកថវិកានេះ គឺក្នុងគោលបំណងចូលរួមមនុស្សធម៌ ជាបន្តទៀត ដើម្បីជួយ និងផ្ដល់ជូនគ្រួសារក្រីក្រចាស់ជរា គ្មានទីពឹង ទូរគតជន ក្មេងកំព្រា គ្រួសាររងគ្រោះដោយសារគ្រោះធម្មជាតិ និងគ្រោះមហន្តរាយផ្សេងៗ និងដើម្បីចូលរួមចំណែកជាមួយរាជរដ្ឋាភិបាល ក្នុងការកាត់បន្ថយភាពក្រីក្រ នៅក្នុងប្រទេសកម្ពុជា៕
